Høyring av framlegg om utvida skjenketid for utandørsarrangement

Endring av lokal forskrift § 4-1, samt retningsline for tildeling av skjenkeløyve for arrangement utandørs.

15. september gav formannskapet i PS 31/25, kommunedirektøren i oppdrag å starte arbeidet med å endra forskrift om opningstider, samt skjenke og salstider, Stord kommune, Vestland § 4-1, Arrangement utandørs, og utarbeide vilkår for tildeling av slike skjenkeløyve. Saka vert lagt ut på høyring, med sikte på politisk handsaming i RHO og kommunestyret i desember. 

Målet er å leggje til rette for eit godt kultur- og næringsliv, samstundes som det vert teke omsyn til lokalmiljøet for øvrig.

Endringar:

Kommunedirektøren meiner at skjenketida for arrangement utandørs, som hovudregel, bør vera avgrensa til kl. 23:00, medan formannskapet ber om å utvide skjenketida fram til kl. 01:00. Kommunedirektøren føreslår ei endring i lokal forskriftstekst § 4-1, til ...«som hovudregel» avgrensa til kl. 23:00. Endringa opnar for at det etter ei særskilt og heilskapleg vurdering kan bli gjeve løyve med skjenketid etter kl. 23:00 for nokre arrangement utandørs.

For å standardisera skjønnsutøvinga og sikra likehandsaming av ulike søknader om skjenkeløyve for arrangement utandørs i Stord kommune, meiner kommunedirektøren at kriterium og vilkår for tildeling av skjenkeløyve med skjenketid etter kl. 23:00 bør implementerast i retningsliner for tildeling av sals- og skjenkeløyve i Stord kommune 2024-2028.

Kommunedirektøren føreslår at kommunestyret vedtek eit nytt punkt under 7.1. i retningsliner for tildeling av sals- og skjenkeløyve i Stord kommune 2024-2028:

6. Arrangement utandørs

Det kan som hovudregel bli tildelt løyve for arrangement utandørs fram til kl. 23:00, jf. Ny forskrift om opningstid for serveringsstader, samt skjenke- og salstider, Stord kommune, Vestland, § 4-1.

For å ivareta ein god balanse mellom kultur- og næringspolitiske omsyn, og omsynet til lokalmiljøet for øvrig, er skjenkeløyve med utvida skjenketida avgrensa til seinast kl. 01:00, natt til laurdag og natt til søndag, for éit særskilt årleg arrangement per løyvehavar.

For å førebyggja dei skadeverknadane alkoholbruk kan innebera, samt sikra forsvarleg utøving av skjenkeløyvet, gjeld følgjande særskilte vilkår for utvida skjenketid:

a. Løyvet er avgrensa til alkoholgruppe 1 og 2

b. Løyvehavar skal sikra at eit utval av alkoholfrie og alkoholsvake alternativ er lett tilgjengeleg under arrangementet.

c. Personell skal få opplæring i ansvarleg vertskap og ha rutinar for å avvise personar som er openbart påverka av rusmiddel.

d. Internkontroll etter alkoholforskrifta kap. 8, skal særskilt dokumentera tiltak for å ivareta punkta 7.1.3 og 7.1.6, b og c, og vera sendt inn til kommunen seinast 14 dagar innan arrangementsdato. Mangelfull internkontroll innan frist kan føre til avslag på søknad om utvida skjenketid.

e. Etter arrangementet skal det snarast, og innan 14 dagar, sendast inn rapport om faktisk omsett mengd alkohol. Dersom tilsynsmynde melder frå om brot på alkoholregelverket, skal løyvehavar i tillegg senda inn ei beskriving av relevante forbetringstiltak.

f. Manglande innrapportering i samsvar med punkt e kan få konsekvens for seinare tildeling av skjenkeløyve for utandørsarrangement, ut over hovudregelen.

Gjeldande forskrift Lenke til et annet nettsted, åpnes i nytt vindu.

Gjeldande retningsline Lenke til et annet nettsted, åpnes i nytt vindu.

Høyringsfrist:

Alle kan senda innspel til høyringa.

Innspel må sendast inn innan 13.11.2025