Offentleg høyring om mellombels utviding av skjenketid under fotball-VM, frå 11. juni til 19. juli 2026

Høyringsfrist:  05. april 2026

Forslag om mellombels endring av forskrift om opningstider for serveringsstader, samt skjenke- og salstider, Stord kommune, Vestland.

Bakgrunn for forslaget:

Det norske herrelandslaget i fotball har kvalifisert seg til fotball-VM 2026. Meisterskapen vert halde i USA, Canada og Mexico i perioden 11. juni til 19. juli. På grunn av tidsforskjellen vil nokre kampar bli sendt på tidspunkt utover alkohollova si maksimaltid.

Helse- og omsorgsdepartementet har sendt på høyring ei mellombels endring av § 4-4, om alkohollova si maksimaltid for skjenking under fotball-VM for herre 2026. Forslaget opnar for at kommunestyret i perioden 11. juni til 19. juli 2026 kan fastsetja skjenketider som avviker frå alkohollova § 4-4.

I forslaget frå Helse og omsorgsdepartementet går det fram at skjenketider som avviker frå lova si alminnelege maksimaltid berre kan fastsetjast for:

• Skjenking av alkoholhaldig drikke gruppe 1 og 2.
• Skjenkestader som viser direktesending av kampane i fotball-VM 2026 og skjenketida vert knytt opp til kamptida med ½ times konsumtid.
• Skjenketida kan utvidast i samsvar med punktet over, men likevel ikkje lengre enn til kl. 06:00.
• Perioden 11. juni til 19. juli 2026.
  

I møte den 11.03.2026 bad Formannskapet kommunedirektøren om å legge fram eit forslag til mellombels utvida skjenketid under fotball-VM, 2026.

I samsvar med helse- og omsorgsdirektoratet sitt forslag om mellombels endring av alkohollova § 4-4 nytt niande ledd, frå 11. juni til 19. juli 2026, føreslår kommunedirektøren at kommunestyret vedtek ei mellombels endring i Forskrift om opningstider for serveringsstader samt skjenke- og salstider i Stord kommune, § 4.

Kommunedirektøren si innstilling

Kommunestyret vedtek følgjande mellombelse endring i forskrift av 17. juni 2024 nr. 1231 om opningstider for serveringsstader, samt skjenke- og salstider, Stord kommune Vestland:

                                      I
I forskrift av 17. juni 2024 nr 1231, om opningstider for serveringsstader, samt skjenke- og salstider m.v. skal § 4 nytt tredje ledd lyde:

Kommunestyret utvidar i perioden 11. juni til 19. juli skjenketida for alkoholgruppe 1 og 2, for skjenkestader som viser direktesendte kamper i fotball-VM for herrar som pågår etter skjenkestadene sine alminnelege skjenketider. Utvida skjenketid vert fastsett for den enkelte skjenkestad etter søknad.

                                        II
Forskrifta trer i kraft straks. Forskrift om opningstider for serveringsstader, samt skjenke- og salstider, Stord kommune, Vestland, § 4 tredje ledd vert oppheva 20. juli 2026.