Klar for moro i bassenget: Stord kulturhus har fått godkjent vassrutsjebana

Statens jernbanetilsyn har no gitt Stord kommune driftstillatelse for vassrutsjebana ved Stord kulturhus. Dette betyr at den populære attraksjonen igjen kan takast i bruk – til glede for små og store badegjester.

Etter ein grundig søknadsprosess og vurdering har Statens jernbanetilsyn (SJT) gitt grønt lys for vidare drift av vassrutsjebana med namnet «Norslide vannrutsjebane». Banen har har vore ein fast del av bassengopplevinga ved Stord kulturhus sidan 1993.

Før bana vert opna for publikum, skal alle badevaktene våre få naudsynt opplæring i drift og trygg bruk av rutsjebana. Dette er eit viktig ledd i arbeidet med å sikra ei trygg og god badeoppleving for alle.

– Me er glade for å ha fått dette på plass, og ser fram til å ønskja publikum velkommen til trygg og kjekk rutsjebanemoro i bassenget, seier leiar ved Stord kulturhus, Anne Lene Østvold Jordåen.

Vassrutsjebana er 3,70 meter høg og 30 meter lang, og er ein viktig del av badeopplevinga for mange besøkande. Driftstillatelsen frå SJT vart gitt 03.10.25, og kommunen har no alle naudsame godkjenningar på plass.

Sklia opnar 23/10 kl 17.00 og vil vera open slik:

Tysdag - fredag 17.00 - 19.00 og laurdagar 12.00 - 15.00