Birthe Blokhus er tilsett som ny kommunalsjef for oppvekst og kultur i Stord kommune

Blokhus har lang og solid leiarerfaring frå kommunal sektor, og brei erfaring frå ulike delar av oppvekstfeltet.

Stord kommune har etter ein grundig rekrutteringsprosess tilsett Birthe Blokhus som ny kommunalsjef for oppvekst og kultur.

Ho har sidan 2016 vore einingsleiar i førebyggande tenester i Stord kommune, og har gjennom åra vist sterk gjennomføringsevne og trygg leiing i høgt endringstempo og stramme rammevilkår. Blokhus har inngåande kjennskap til kommunen, organisasjonen og regionen, og syner god rolleforståing i møtet mellom politikk og administrasjon.

Leiarskapet hennar er prega av tydeleg retning, involvering og relasjonsbygging, kombinert med evne til å samle organisasjonen om felles mål. Som kommunalsjef vert Birthe leiar for dei kommunale grunnskulane, vaksenopplæringa, barnehagane, kultureininga, barnevernet og eining for førebyggande tenester.

– Me er svært nøgd med å få Birthe med oss vidare i utviklinga av oppvekst- og kultursektoren i Stord kommune, og ser fram til eit godt samarbeid, seier kommunedirektøren.